தலையுயர்த்தி பின் புறம் வளைத்து
புருவங்கள் வளைத்து
கண்ணிமைப்பெட்டியின்
கால்பாகம் மட்டும் தெரிய
மூக்கு விகசிக்க
உதடு வில்லாய்
மாதுளை பற்கள்
மின்னலாய் விரிய
சிரிக்கையில் ஒரு அழகு !
தலை குனிந்து கீழ் நோக்கி
புருவங்கள் சுருக்கி
கண்ணிமைகளின் மேற்க்கூரையை
கண்மணியின் மேல்நுனி தொட
கன்னங்கள் உப்பி
மூக்கு கூராக
உதடு சுருக்கி
மூடி முறைக்கையில் ஒரு அழகு !
தலையை நிமிர்த்தி
நேராய் பார்த்து
புருவங்கள் மேலுயர்த்தி
கண்ணிமைகளை அகல விரித்து
கண்மணியை வெளியே தள்ளி
கன்னங்கள் சுருக்கி
மேலுதடு மூக்கைத்தொட
கீழுதடு தாடைவரை நீள
குவித்து கோபப்படுகையில் ஒரு அழகு !
சொர்க்கத்திலிருக்கும்
தேவதைகளுக்கெல்லாம்
ராஜகுமாரியானவள்
அழகுக்கெல்லாம் அரசியாய்
உறங்கிக்கொண்டிருக்கிறாள்.
என் கருவுக்குள் நுழைந்த
அவளுடைய ஆன்மா
இற்றைக்கு இரண்டு
வருடங்களுக்கு முன்
மகளெனும் வரமாய்
என் மடியில் விழுந்து
தவழ்ந்து நடந்து என்னோடு
வாழ்ந்து கொண்டிருக்கின்றது !
கருத்துகள் இல்லை:
கருத்துரையிடுக